بطاطس محمرة دايت

طبعا كتير منا بيموت فى البطاطس المحمرة و اولكم أنا و كتير بيعمل دايت و بيبقى نفسه فى البطاطس المحمرة طيب ايه الحل؟؟؟؟؟؟؟؟ بصى على الطريقة دى

1)بتجيبى البطاطس و تقشريها و تسلقيها فى مياة و ملح نصف سلقة

2)بطلعى البطاطس و تقطعيها صوابع او اى شكل عايزاة و رشيها بحتة زيت صغيرة و حطيها فى الفرن تكمل سواها و تتحمر

و بالهنا و الشفا احلى بطاطس محمرة و صحية و دايت من غير دهون

...المزيد

مسقعة دايت

المقادير:

1)      2 كيلو باذنجان

2)      نصف كيلو لحمة مفرومة

3)      بصلة كبيرة

4)      2 فص ثوم مفروم

5)      كباية عصير طماطم

6)ملح و فلفل اسود و بهارات لحمة

الطريقة:

1)قطعى الباذنجان شرايح حطيلها ملح و فلفل

2)اشويها فى طاسة تيفال فيها نقطة زيت

3)جيبى حلة و شوحى البصل المفروم و الثوم المفروم و حطى عليهم اللحمة المفرومة و قلبى فيها لحد ما تستوى و لما تحسى انها هتنشف زودى شوية مياة

4)بعدين حطى الملح و الفلفل و بهارات اللحمة و و حطى عليها عصير الطماطم بكده تبقى عصجتى اللحمة

5)جيبى صينية و حطى الباذنجان و بعدين اللحمة المعصجة و بعدين طبقة تانية من الباذنجان

و ممكن تقطعى شرايح طماطم و تحطيها على الوش و دخليها الفرن و طلعيها

و بالهنا و الشفا

...المزيد

نجرسكو دايت

المقادير:

1)فرخة كاملة منزوعة الجلد و العظم

2)لتر لبن خالى الدسم

3)حوالى 4 ملاعق كبيرة دقيق

4)مكرونة شريط

الطريقة:

1)تسلقى الفرخة

2)بعد ما تستوى الفرخة طلعيها و سيبيها تبرد و بعدين قطعيها قطع صغيرة

3)جيبى حلة و اغلى اللبن

4)دوبى 4 معالق الدقيق فى كوبايتين مياة كويس و ضيفيهم على اللبن و هو بيغلى و قلبى كويس عشان ميكلكش منك لحد ما توصلى لقوام مناسب لا سايب اوى و لا جامد اوى و حطيله شوية ملح و فلفل

5)اسلقى المكرونة

6)جيبى صينية و ادهنيها بحتة زيت بسيطةو حطى كبشة من البشاميل فى قعر الصينية

7)اخلطى المكرونة بشوية بشاميل و كل كمية الفراخ كويس و حطيها فى الصينية و دخليها الفرن تحت الشواية تاخد لون بس لان كل المكونات اصلا مستوية

و بالهنا و الشفا

...المزيد

شاورما فراخ دايت

المقادير:

1)نصف كيلو صدور فراخ

2)2 ثمرة بصل

3)2 فص ثوم مفروم

4)علبة زبادى لايت

5)ملعقة مستردة صغيرة

6)ملح و فلفل اسود و بهارات

7)فلفل الوان

الطريقة:

1)تقطعى الفراخ مكعبات و تتبليها بالملح و الفلفل و عصرة ليمون و البهارات و الزبادى اللايت و المستردة و سيبيها فى التتبيلة مش اقل من ساعتين

2)قطعى الفلفل الالوان شرايح و شوحيه فى طاسة تيفال مع نقطة زيت

3)جيبى طاسة تيفال و حطيها على النار لما تبقى سخنة مولعة حطى الفراخ اديها صدمة لحد ما تتقفل مسامها عشان مش تجيب ميتها

4)حطى الفراخ على الفلفل الالوان المتشوح

و اقعدى شويحها مع الفراخ لحد ما تستوى و لو حاسة انها هتنشف حطى حبة مياة صغيرة

و اغرفيها و قدميها مع مكرونة مسلوقة و بالهنا و الشفا

...المزيد

بيكاتا بالمشروم دايت

المقادير:

1)نصف كيلو لحمة تليبيانكو (دى مخصوصة عشان البيكاتا  عشان سميكة شوية بس لو مش موجودة تقدرى تستخدمى اللحمة البوفتيك العادية )

2)2 ثمرة بصل

3)2 فص ثوم مفروم

4)ملح و فلفل اسود

5)ملعقة صغيرة بهارات لحمة

6)250 جرام مشروم (يفضل الطازج لو مفيش يبقى المعلب)

الطريقة:

1)تتبلى الحمة بالملح و الفلفل و البصل المفروم و الثوم المفروم وعصرة ليمون و بهارات اللحمة

2)تجيبى طاسة تيفال و تحطى نقطة زيت وتشوحى اللحمة عشان تتقفل مسامها

3)بتنقلى اللحمة بعد ما اتشوحت و اتقفلت مسامها فى صينية تيفال عشان مش تلزق اللحمة فيها و تحطيها فى الفرن لحد ما تستوى و لما تحسى انها هتنشف حطى شوية مياة

4)تقطعى المشروم شرايح و تحطى عليه عصرة ليمون عشان ميسودش

5)تشوحى المشروم فى نفس الطاسة اللى شوحتى فيها اللحمة عشان تاخد من طعم اللحمة

6)تطلعى اللحمة من الفرن و تحطى عليه المشروم و تجمليه بالبقدونس

و بالهنا و الشفا

دى اكلة حلوة اوى و صحية عشان مش نحرم نفسنا من حاجة و فى نفس الوقت تكون صحية

...المزيد