همبرجر دايت

المقادير:

نص كيلو لحمة مفرومة

2 ثمرة بصل متوسطة مفرومة ناعم جدا

2 فص توم مفروم ناعم

شوية بقدونس

ملح

فلفل اسود

بهارات البورجر او بهارات عادية

2 ثمرة طماطم مقطعة شرايح

خس

شرايح جبنة شيدر لايت

بياض بيضة

عيش كيزر

الطريقة:

شوحى نص كمية البصل فى نقطة زيت صغيرة على النار

هاتى بولة كبيرة و اخلطى فيها اللحمة المفرومة مع كمية البصل التانية و البقدونس و الملح و الفلفل و البهارات و كمية البصل اللى اتشوحت

اعجنيهم مع بعض كويس

شكلى اقراص البرجر و يستحسن تدخليها الفريزر ساعة او اتنين عشان تتماسك

طلعيها بعد كده و جيبى طاسة و سيبيها تسخن اوى اوى

حطى بعدين فيها نقطة زيت و وزعيها كويس

حطى اقراص الهمبرجر 10 دقايق على كل جهة

بعد كده شيليهم و حطيهم  فى صينية مدهونة بنقطة زيت بمنديل و دخليهم الفرن لحد ما تستوى

و بعد كده طلعيهم و حطى على كل واحدة شريحة الجبنة الشيدر اللايت و دخليها الفرن تانى لحد ما تسيح عليها

جيبى عيش الكيزرو قسميه نصين

و حطى الخس تحت و شريحة طماطم و بعدين قطعة البرجر و غطيه بالنص التانى من العيش

و بالهنا و الشفا

ملحوظة:ممكن تعملى نفس الطريقة مع الفراخ بصدور الدجاج المفرومة

...المزيد

كوسة بالباشاميل دايت

المقادير:

2 كيلو نص كوسة

نص كيلو لحمة مفرومة معصجة

لتر لبن خالى الدسم

4 ملاعق دقيق

3 شرايح جبنة موزاريللا لايت

الطريقة:

قطعى الكوسة حلقات

اسلقيها فى مياة و ملح  بس مش تسيبيها تتهرى

طلعى الكوسة و صفيها و سيبيها تبرد شوية

عصجى اللحمة

حطى لتر اللبن الخالى الدسم يغلى على النار

دوبى 4 ملاعق الدقيق فى كوبايتين مياة كويس و انزلى بيهم على اللبن اللى بيغلى و قلبى كويس باستمرار لحد ما توصلى للقوام المناسب

جيبى صينية و ادهنيها نقطة زيت بمنديل

حطى كبشة من الباشاميل فى القعر

حطى طبقة من الكوسة

و بعدين طبقة اللحمة المعصجة

و طبقة تانية من الكوسة

و اخيرا غطيها بالباشاميل و بين الطبقات برده باشاميل

و حطى على الوش شرايح الجبنة الموزاريلا اللايت

دخليها الفرن تحت الشواية لحد ما الجبنة تذوب و الاكلة تسخن شوية لان كل المكونات مستوية قبل كده

و بالهنا و الشفا

...المزيد

طاجن سردين دايت

جيبى السردين نظفيه كويس
تبليه ملح و فلفل و كمون
جيبى صينية و ادهنيها زيت بمنديل
قطعى بصل شرايح و حطى نص الكمية فى القعر
حطى السردين
حطى بقية كمية البصل على الوش و ليمون و فلفل و فلفل حار لو حابة
رشى شوية زيت على الوش صغننين

و بالهنا و الشفا
جربوها و قولولى رايكم

...المزيد

سلطة بابا غنوج دايت

المقادير:

كيلو باذنجان

2 فص ثوم مفروم

2 ليمونة

بقدونس مفروم ناعم

ملعقة ملح صغيرة

2 ملعقة زيت زيتون

علبة زبادى لايت

الطريقة:

اغسلى الباذنجان و شيلى القرون الخضرا دى اللى فيه

اشويه فى الفرن فى درجة حرارة عالية جدا لحد ما يستوى

سيبيه يبرد و بعد كده قشريه و اهرسيه جامد بالهراسة

حطى عليه الملح و اعصرى الليمونتين عليهم البقدونس المفروم الناعم و الزبادى اللايت

و اخلطيهم كويس

و اخيرا حطى ملعقتين زيت زيوت صغيرين

و بالهنا و الشفا

تقدم مع الاسماك او الكبدة 

...المزيد

كبدة بالردة دايت

المقادير:

نص كيلو كبدة

2 فص ثوم مفروم

ملح

فلفل اسود

2 ليمونة

كمون

رشة شطة للى حابب

ردة

الطريقة:

قطعى الكبدة  شرايح زى الفراخ بانيه و هى متجمدة عشان يسهل تقطيعها

تبلى الكبدة ملح و فلفل و ليمون و كمون و رشة الشطة

حطيها فى الردة و غطيها من الناحيتين  و اكبسيها كويس

هاتى صينية و حطى فيها الومنيوم فويل و ادهنيها نقطة زيت بمنديل عشان مش يلزق فيها الاكل

حطى الكبدة فيها و دخليها الفرن فى درجة حرارة متوسطة و قلبيها بعد شوية على الوش التانى عشان يتحمر لحد ما تستوى

و بالهنا و الشفا

...المزيد

طاجن لسان عصفور دايت

المقادير:

2 كيس لسان عصفور

نص كيلو لحمة  مفرومة

3 شرايح جبنة موزاريلا لايت

الطريقة:

جيبى حلة  و سبيها تسخن و حطى نقطة زيت و شوحى فيها للسان عصفور لحد ما يبقى لونه بنى فاتح و حطى عليه مياة لحد ما المياة تغطى اللسان عصفور و سيبيه يتسوى فى المياة لحد ما ميته تنشف

عصجى اللحمة و أنا شرحت قبل كده فى وصفات تانية طريقة تعصيج اللحمة

جيبى صينية ادهنيها نقطة زيت بمنديل و حطى طبقة من اللسان عصفور

حطى طبقة من اللحمة المفرومة

و اخيرا طبقة تانية من اللسان عصفور

حطى شرايح الجبنة الموزاريلا اللايت

و دخليها الفرن لحد ما الجبنة تدوب فيها بس لان باقى المكونات مستوية

و بالهنا و الشفا

...المزيد

فراخ بانيه دايت

اكيد احنا كمان نفسنا فى البانيه بس محرومين منه عشان القى و الزيت طبعا دمار للدايت طيب ايه الحل؟

أنا هقولكم طريقة حلوة اوى

المقادير:

نص كيلو صدور فراخ مخلية

ملح

فلفل اسود

علبة زبادى لايت

2 ليمونة

ملعقة عسل ابيض صغيرة

2 بياض بيض

بقسماط مطحون يستحب اللى هو غامق يعنى دايت لو مفيش يبقى العادى

الطريقة:

تبلى صدور الفراخ بالملح و الفلفل و الليمون و الزبادى اللايت و ملعقة العسل الابيض

سيبيها فى التتبيلة حوالى ساعة

حطيهم فى بياض البيض

و بعد كده فى البقسماط المطحون و اكبسى عليها جامد

جيبى صينية وحطى فيها ورق الومنيوم و ادهنيها بزيت بمنديل كويس عشان الفراخ متلزقش

و حطى فيها الفراخ و دخليها الفرن فى درجة حرارة متوسطة و قلبيها على الوش التانى عشان يحمر برده لحد ما تستوى

و بالهنا و الشفا

...المزيد

بيتزا دايت

المقادير:

كوب و نصف دقيق أبيض

كوب و نصف دقيق اسمر

علبة زبادى لايت

3 ملاعق صغيرة زيت زيتون او زيت نباتى

1ملعقة صغيرة خميرة فورية

1 ملعقة كبيرة بيكنج بودر

رشة زعتر

رشة ملح

نص ملعقة صغيرة سكر

ماء دافئ للعجن

الطريقة:
تخلطى الدقيق الابيض بالدقيق الاسمر

دوبى الخميرة فى حبة مياة صغيرين و حطى عليهم السكر و دوبى و سيبيهم 5 دقايق

اعملى حفرة فى الدقيق و حطى عليها الخميرة المتدوبة فى المياة

حطى عليهم الزبادى اللايت و رشة الملح و الزعتر و قلبيهم كلهم مع بعض

ابدأى اعجنى لمدة ربع ساعة لحد ما تتكون معاكى عجينة متماسكة

غطى العجينة بفوطة مطبخ و سيبيها تتخمر فى مكان دافى لمدة ساعة الى ساعتين لحد ما العجينة ترتفع

افردى العجينة على سطح مرشوش بالدقيق

حطيها بعد كده فى الصينية تكون مرشوشة دقيق برده

حطى اى حشوة انتى عايزاها بس تكون دايت لان الوصفة دى دايت(سوسيس مسلوق او مشوى –تونة متصفية كويس من الزيت –ربع فرخة مسلوقة مثلا)

و حطى الطماطم و و الفلفل  و ملعقة صلصة صغيرة قبل ما تحطى الحشو ده

و تكونى مسخنة الفرن على درجة حرارة علية

و دخلى البيتزا فيه و خلى درجة الحرارة متوسطة عشان مش تتحرق من تحت

و لما تستوى طلعيها و حطى شرايح جبنة موزاريللا لايت و دخليها تحت الشواية لحد ما الجبنة تدوب فيها و تسيح

و بالهنا و الشفا

ملحوظة: انتى بتاخدى شريحتين بس عشان الدايت هى اه الوصفة دايت بس طبعا مش هتاكليها كلها عشان السعرات

...المزيد

كريب حادق دايت

المقادير:

كباية لبن خالى الدسم

كباية دقيق اسمر (انا بفضل ده عشان الدايت)بس ممكن تحطى دقيق ابيض

بيضة

ربع ملعقة ملح

شوية زيت صغيرين

الطريقة:

انخلى الدقيق فى طبق للعجن و ضيفى الملح

حطى البيضة و اللبن و قلبى

حطى شوية لبن كمان و قلبى لحد ما تبقى عجينة ناعمة

حطى الزيت و بقية اللبن و قلبى تانى لحد ما تبقى ناعمة

بعد كده سيبى العجينة فى الهوا تقريبا ساعة

جيبى بعد كده طاسة تيفال و ادهنيها شوية زيت بسيطة بمنديل كويس عشان الكريب مش تلزق

و بكبشة خدى حبة من العجينة و حطيها على الطاسة فى النص على شكل دايرة و حركى الصينية بطريقة دائرية عشان العجينة تفرش فى الطاسة كلها

بعد 30 ثانية تقريبا هيكون القعر احمر شوية اقلبيها بالراحة على الوش التانى

و بعد 30 ثانية كمان تكون الكريب استوت

حطيلها اى حشو انتى عايزاه بس يكون دايت لان دى وصفة دايت

و بالهنا و الشفا جربوها و ادعولىمتنسوش التقييم 

...المزيد

صينية بطاطس بيوريه دايت

المقادير:

2 كيلو بطاطس

نص كيلو لحمة معصجة و انا شرحت فى الوصفات اللى قبل كده طريقة تعصيج اللحمة

2 ثمرة بصل متوسط

2 فص ثوم

ملح و فلفل اسود و بهارات اللحمة

كباية عصير طماطم

نص كباية لبن خالى الدسم

الطريقة:

جيبى صينية ادهنيها بنقطة زيت و رشى شوية بقسماط مطحون عشان الاكل مش يلزق

البطاطس قشريها و قطعيها نصين و اسلقيها فى مياة و ملح و كمون

بعد ما تستوى البطاطس صفيها من المياة و اهرسيها بالهراسة و حطيها فى حلة

ضيفى عليها نص كباية  اللبن خالى الدسم و ملح و فلفل اسود

و حطى طبقة من البطاطس

و طبقة لحمة مفرومة

و طبقة تانية بطاطس

و اخيرا ممكن لو حابة رشى شوية جبنة مبشورة لايت

و دخليها الفرن تاخد بس لون لان كل المكونات مستوية

و بالهناو الشفا جربوها و متنسونيش بالتقييم

...المزيد

طريقة عمل كيكة دايت

المقادير: 1 و نصف كوباية دقيق اسمر

ملعقة بيكربونات صوديوم

رشة ملح و رشة فانيليا

ربع او نص كباية سكر دايت

نصف كوباية زيت

نصف برتقالة مبشورة

ملعقة صغيرة بشر برتقال

الطريقة:

تخطى المكونات السائلة كلها و بعدين تضيفى الدقيق و تقلبى بالراحة لحد ما يبقى خليط انسيابى

جيبى قالب الكيك و ادهنيه نقطة زيت من كل الجهات و انزلى بالعجينة لحد تلات اربعها عشان هى لسة هتنفش فى الفرن

و دخليها الفرن لحد ما تستوى حوالى نص ساعة

ملحوظة :اوعى تفتحى الفرن قبل ما المدة تخلص حتى لو شميتى ريحتها عشان متهبطش منك

و بالهنا و الشفا

...المزيد

طريقة عمل المكرونة بالباشاميل دايت

المقادير:

2 كيس مكرونة قلم

نصف كيلو لحمة مفرومة

2 ثمرة بصل متوسط

2 فص ثوم مفروم

بقدونس

كوب عصير طماطم

لتر لبن خالى الدسم

4 ملاعق دقيق

الطريقة:

هتعصجى اللحمة: هتجيبى حلة تيفال و تحطى نقطة زيت و انزلى عليها بالبصل لحد ما يدبل بس مش يتحرق

و انزلى بالثوم المفروم و البقدونس و اللحمة المفرومة

اقعدى قلبى فيها لحد ما يتغير لونها و كل ما تحسى انها هتنشف زودى شوية مياة صغيرة و لما تستوى انزلى عليها بالملح و الفلفل و البهارات و عصير الطماطم

اسلقى المكرونة

اغلى اللبن

دوبى 4 ملاعق الدقيق ف كوبايتين مياة كويس و انزلى بيهم على اللبن الى بيغلى و قلبى كويس عشان ميكلكعش منك

و افضلى قلبى لحد ما توصلى للقوام المناسب

جيى صينية ادهنيها نقطة زيت و حطى كبشة من الباشاميل فى القعر

و بعدين طبقة من المكرونة

طبقة من اللحمة المعصجة

و طبقة تانية من المكرونة و غطيها بالباشاميل و ممكن بين الطبقات كمان تحطى باشاميل

و لو حبة ترشى على الوش جبنة مبشورة دايت اوك

و بالهنا و الشفا طعمها ميفرقش كتير عن المكرونة بالباشاميل العادية بس دى صحية و مفيهاش دسامة و ولا سعرات كتير يبقى ليه مش نعملها بالطريقة دى و نخلى اكلنا صحى

ملحوظة :المقادير دى كلها على قد الاسرة انتى بتاخدى قطعة واحدة بس احسن تفهمونى غلط هههههه

يلا جربوها و ادعولى و مش تنسونى بالتقييم

...المزيد

طريقة عمل فلافل (طعمية) لذيذة و دااااااااايت

المقادير:

2 كوب من الفول المقشر

1 كوب من الحمص

1 ثمرة بصل متوسطة الحجم

حزمة بقدونس

حزمة كزبرة خضراء

1 بصل اخضر او ابيض

ملعقة كبيرة بيكنج بودر

ملعقة صغيرة كمون

قليل من البهارات و قليل من الملح

الطريقة:

تنقى الفول و الحمص من الاوساخ و تنقعيهم فى مياة 12 ساعة

تصفيهم من المياة و تطحنيهم

قشرى البصل و اغسلى و قطعى الكزبرة و البقدونس

اخلطى جميع المقادير فى مفرمة اللحم مرتين لحد ما يبقى خليط ناعم

ضيفى الملح و الكمون و البهارات و لو حابة رشة شطة اوك

اعجنيها بايدك لحد ما تبقى عجينة متماسكة

ضيفى البيكنج بودر

خمريها لمدة نصف ساعة

جيبى قولت الكب كيك و ادهنىيها بنقطة زيت و حطى العجينة و دخليها الفرن تستوى

و بالهناو الشفا يا رب تعجبكوا و متنسونيش فى التقييم

...المزيد